16 ёшгача ўсмирлар ўртасида Бутунжаҳон Шахмат Олимпиадаси қаҳрамонларини тақдирлаш маросими бўйича

6 декабрь куни шахмат буйича Республика ихтисослаштирилган болалар-ўсмирлар спорт мактабида жорий йилнинг 24 ноябрь-2 декабрь кунлари Туркиянинг Коня шахрида ўтказилган 16 ёшгача ўсмирлар ўртасида Бутунжахон Шахмат Олимпиадасида Олтин медални қўлга киритган спортчиларни такдирлаш маросими бўлиб ўтди. Тадбирда Ўзбекистон Республикаси Бош вазирининг ўринбосари Абдухакимов Азиз Абдукаххарович, Ўзбекистон Республикаси Халк таьлими вазири Шерматов Шерзод Хотамович, Ўзбекистон Республикаси Мактабгача таьлим вазири-Шин Агрепина Васильевна,  Ўзбекистон Республикаси Жисмоний тарбия ва спорт вазири ўринбосари-Шарифжон Фузаилович Муминджанов-, Ўзбекистон Миллий Олимпия Қўмитаси биринчи вице президенти Худайкулов Назиржон Мукаррамович хамда Бош котиби Жасур Матякубович Матчанов ва Ўзбекистон Шахмат Федерацияси биринчи вице президенти Турдиалиев Хусан Худайкулович иштирок этди. Тадбир давомида Бош вазир ўринбосари Азиз Абдуҳакимов сўзга чиқар экан, қўлга киритилган муваффақият замирида мамлакатимиз раҳбари томонидан спортга қаратилаётган эътибор, ғамхўрлик тургани ҳақида гапирди.

"Ушбу муваффақиятингиздан Сиз учун барча шароитларни яратиб бераётган муҳтарам Президентимиз Шавкат Миромонович Мирзиёев жуда хурсанд бўлдилар. Бугун мамлакатимиз раҳбари номидан Сизларни табриклаш мен учун катта шарафдир. Сиз мусобақада шахмат оламида ўзига яраша нуфузга эга бўлган мамлакатлар - Россия, Хитой, Ҳиндистон, Эрон, шунингдек, Украина, Венгрия, Польша, Молдова вакилларини мағлубиятга учратдингиз. Бу эса ғалабангиз салмоғини янада ошириши шубҳасиздир.

Бугунги кунда мамлакатимиз раҳбари томонидан спортни ривожлантиришга алоҳида эътибор қаратилмоқда. У кишининг қўл остида турли ислоҳотлар ва лойиҳалар амалга оширилмоқда. Буларнинг барчаси албатта спортчиларимизга янада яхшироқ шароитлар яратишга қаратилган. Сизларнинг халқаро аренада қайд этган ушбу ғалабангиз биз тўғри йўлда эканлигимизни яна бир бор тасдиқлади.

Бунгача ақл-идрок соҳибларимизнинг мазкур ўйинларда кўрсатган энг яхши натижалари 2004 йилда бўлганди. Ўшанда спортчиларимиз учинчи ўринга эга чиққандилар. Бу сафар эса сиз тарихий натижани қайд этиб, олдингизга қўйилган вазифани аъло даражада бажардингиз.

Сизлардан келажакда умидимиз катта. Ишонаманки, эришилган муваффақият билан тўхтаб қолмайсизлар ва келажакда ўзбек шахмати тарихида янги саҳифа очишда давом этасизлар", - деди Бош вазир ўринбосари.

Сўнгра Ўзбекистон шахмат федерацияси раиси ўринбосари Ҳусан Турдалиев сўзга чиқиб, яратилган шароитлар учун миннатдорчилик билдирди.

Шундан сўнг шахмат Олимпиадаси қаҳрамонлари - Нодирбек Абдусатторов, Нодирбек Ёқуббоев, Шамсиддин Воҳидовларга Ўзбекистон Республикаси Президенти совғаси - "Спарк" автомобиллари топширилди.

Мураббий Сайдали Йўлдошевга эса Миллий олимпия қўмитаси номидан          15 000 000 сўм миқдоридаги мукофот пули тақдим этилди.

Маросимда сўзга чиққан Нодирбек Абдусатторов кўрсатилаётган бундай эътибор, ғамхўрлик учун ўз миннатдорчилигини билдириб ўтди. Ушбу рағбатга жавобан бундан кейин ҳам юксак марраларни забт этишга ваъда берди.

Тақдирлаш маросими якунига етганидан сўнг Бош вазир ўринбосари Азиз Абдуҳакимов ва Нодирбек Абдусатторов ўртасида шахмат бўйича ўртоқлик ўйини ташкил этилди. Дўстона рухда кечган учрашув дуранг ҳисобда якунланди.

 

16 ёшгача ўсмирлар ўртасида Бутунжаҳон Шахмат Олимпиадаси якунлари бўйича маълумот

          2018 йил 24 ноябрь-2 декабрга қадар Туркиянинг Коня шаҳрида ўтказилган 16 ёшгача ўсмирлар ўртасида Бутунжаҳон Шахмат Олимпиадасида дунёнинг 39 мамлакатидан 222 нафар ўсмирлар иштирок этди. Мусобақа жамоалар ўртасида( 4 нафар асосий таркиб ва 1 нафар заҳира) ташкил этилиб, жами 9 турда иштирокчилар ғолиблик учун кураш олиб бордилар. Жами жамоалар сони 46 тани ташкил этди.

         Ўзбекистон шарафини қуйидаги спортчилар муносиб ҳимоя қилдилар:

1)     Халқаро гроссмейстер Абдусатторов Нодирбек (2004 й.т, Тошкент), биринчи тахтада энг кучли спортчилар билан дона суриб, 9 имноятдан       5,5 очко жамғариб, ўз тахтасида 4-ўринни эгаллади.

2)     Халқаро тоифадаги спорт устаси Якуббоев Нодирбек (2002 й.т., Хоразм), иккинчи тахтада 9 имкониятдан 8 очко жамғариб, ўз тахтасида Олтин медалга сазовор бўлди.

3)   Халқаро тоифадаги спорт устаси Синдаров Жавохир (2005 й.т., Тошкент), учинчи тахтада 7 имкониятдан    4,5 очко жамғарди ҳамда шахсий натижасига кўра, 6-ўринни эгаллади.

4)   Халқаро тоифадаги спорт устаси - Вохидов Шамсиддин (2002 й.т., Тошкент), 8 имкониятдан 7,5 очко жамғариб, тўртинчи тахтада Олтин медални қўлга киритди. 

5)   Спорт усталигига номзод - Сапарова Ситора (2002 й.т.., Навоий),                   3 имкониятдан 1 очко жамғарди.

Жамоа мураббийи-халқаро гроссмейстер Сайдали Юлдошев

 

         Маълумот учун эслатиб ўтамизки, Ўзбекистон терма жамоаси 9 турдан 8 ғалабага ва 1 мағлубиятга эришиб, 16 очко билан ўз тарихида илк олтин медални қўлга киритди (жамолар ғалабаси учун 2 очко, дуранг натижа учун     1 очко ҳамда мағлубият учун 0 очко берилади). Ўзбекистондан кейинги ўринларни Хиндистон(14 очко билан)  ва Хитой (13 очко билан) кучли учликдан жой олдилар.

       Мазкур Шахмат Олимпиадасида энг юқори натижалар 2004 йил Хиндистонда ўтказилган ўсмирлар олимпиадасида 3-ўринни, 2007 йил Сингапулда ўтказилган мусобақаларда 4-ўринни, 2009 йил Туркияда ҳамда 2015 йил Монголияда ўтган Олимпиадада 6 ўринларни, 2017 йил Хиндистонда ўтказилган Олимпиадада 7 ўринларни қайд этган.

         

Маълумот учун:

 Телефон: (71)241-15-44, (71) 241-12-00

 Факс-(71) 241-35-01

 Сайт-www.uzchess.uz

 Электрон почта-uzchess@inbox.ru