Ўзбекистон Республикаси Қуролли Кучлари ташкил этилганлигининг 25 йиллиги муносабати билан 2017 йилнинг 13 январь куни мактаб-интернат фаоллар залида бўлиб ўтган ушбу тадбирда 300 нафардан ортиқ педагог-ходимлар, ўқувчилар, ҳудудаги маҳалла фаоллари ҳамда ота-оналар иштирок этишди. Ўқувчилар томонидан 14 январь – “Ватан ҳимоячилари куни”га бағишланган ғурурбахш тасвирий воситалар тайёрланиб, иштирокчиларга ҳавола қилинди.
Тадбирни мактаб -интернати директори Содиқов С.Т. очиб бераркан, юртимизнинг тинчлиги учун кечаю кундуз хизмат қилаётган ҳарбийларимизни ва барча иштирокчиларни ушбу улуғ сана билан самимий қутлаб, бугунги кунда мамлакатимизда ҳукм сураётган тинчлик ва осойишталикни қадрлашга чорлади. Шундан сўнг ўқувчилар томонидан тайёрланган концерт дастурига навбат берилди. Мусиқа бўлими ўқувчилари томонидан улуғ айёмга бағишланган куй ва қўшиқлар ижро қилинди.
Ўқувчи қизлар ўзларининг жимжимадор либослари ҳамда чиройли рақслари билан барчага кўтаринки кайфият улашишди. Айниқса, истеъдодли ўқувчиларнинг халқ чолғуларини маромига етказиб ижро этиши, Ватанни тараннум айлаган қўшиқлари, таниқли шоирларимиз томонидан ёзилган Ватан, юрт посбонлари ва мардлик, жасурлик ҳақидаги жўшқин шеърларнинг ўқилиши кечага янада бадиий мазмун киритди.
П.Ахмедов