2018 yilning 2 may kuni noma’lum uchinchi shaxslar tomonidan "Fleshka" savdo markazining binosida joylashgan asosiy tayanch stantsiyasining elektr ta'mini o‘chirib qo‘yilgan. "Unitel" MChJ xodimlariga amaldagi shartnoma va "Telekommunikatsiyalar to'g'risida"gi O'zbekiston Respublikasi Qonunini buzgan holda bir nechta radiorereli oraliqlar o‘tadigan mazkur uskunaga qonuniy yo'l bilan kirishlariga yo'l qo'yilmayotganligi sababli “Fleshka” SM atrofida, Taxtapul, Shayxontohur, Ko‘rgazma, Nurafshon, Iftixor, Yangiariq, Xurshida va To‘xtasin Jalilov ko‘chalarida, Sadriddin Yo‘ldoshev va Sharof Rashidov ko‘chalari kesishgan Kichik Halqa yo‘li atrofida, shuningdek Sebzor ko‘chasida Nurafshon ko‘hasidan Zulfiya Xonim ko‘chalari kesishmasida ayni paytda ovozli aloqa va mobil Internet sifati yomonlashgani kuzatilmoqda.
Mazkur voqea "Beeline"ga bog‘liq bo‘lmagan sabablarga ko'ra yuzaga keldi, biroq kompaniya xizmatni qayta tiklash uchun barcha harakatlarni amalga oshirmoqda. "Unitel" MChJ "Beeline" abonentlari uchun aloqa sifatini tiklash borasidagi vaziyatni hal etishda yordam berishlarini so'rab Axborot texnologiyalari va kommunikatsiyalarini rivojlantirish vazirligiga, Toshkent shahar hokimligiga, shuningdek, Aloqa, axborotlashtirish va telekommunikatsiya texnologiyalari sohasida nazorat bo'yicha davlat inspektsiyasiga xatlar yo‘lladi.