Kompozitorning yangi kuni

Yosh kompozitor Mehroj Muxtorovning yangi musiqiy to'plami nashr etildi.

Mehroj Muxtorov ijodida fortepiano alohida o‘rin egallaydi. Musiqiy ifodaviy vositalar, garmoniya va fakturaning uslubiga ko‘ra kompozitorning asarlarini haqli ravishda "Ko’ngil tubidagi tuyg‘ular ifodasi" deb atash mumkin. Mehroj Muxtorov asarlarining satrlarida kompozitor uslubining o‘ziga xos xususiyatlarini ko‘rishingiz mumkin. Taqdim etilayotgan ushbu to‘plamda yosh iste’dodli kompozitorning eng yorqin fortepiano asarlari jamlangan.

Mazkur to‘plam  fortepiano ijrochiligida ustuvor ahamiyat kasb etgan milliy va zamonaviylik mushtaraklik kasb etgan yorqin repertuar  yaratishda o‘ziga xos manba bo‘lib xizmat qiladi. Zero ijrochining kasbiy tayyorgarligi uning fortepianoda ijro etish repertuari bilan bevosita bog‘liqdir. Shu o‘rinda ta’kidlash joizki, Mehroj Muxtorov qalamiga mansub  fortepiano kompozitsiyalarining murakkab ko‘p qirrali tuzilishi ijrochidan muayyan ruhiy tayyorgarlik va ijro mahoratini ham talab qiladi.

Ushbu to‘plam O'zbekiston yosh iste’dodli kompozitorining eng yorqin fortepiano asarlarini qamrab olgan. Bular: “So‘zsiz izhor”, “Yoshlik”, “Bag‘ishlov”, “Ekspromt-fantaziya”, “Kuz”, etyud “Cheksiz harakat”, “Etyud-fantaziya”, fantaziya “Tushdagi raqs”, “Etyud”, “Bolalik”, “DSCH”, “Raqs”, “Etyud-ekspromt”, vals “Aprel”, vals “May”, vals “Iyun”,  “Sog’inch”, 2 ta fortepiano uchun Raqs “Yangi kun”. Barcha asarlar nihoyatda yengil, yorqin intonatsiyalar va sharqona ohanglarga boy. Garmonik yechimlar va boy to‘qilgan faktura Muxtorovning uslubini romantizm bilan bog‘laydi, ohangdor chiziqlarning vokal plastinkasi ijrochida polifonik fikrlashni rivojlantiradi.

Shu bilan birga, fakturaning qulayligi  ijroning sifatli va mazmunli bo‘lishi uchun xizmat qiladi. Bir so‘z bilan aytganda, kompozitor Mehroj Muxtorovning fortepiano asarlari o‘ziga xos bo‘lib ular fortepiano ijrochiligi bo‘yicha musiqa ta’limi uchun zarur bo‘lgan pianist repertuarini boyitishi va yangi ijro istiqbollarini ochishi mumkin.

O‘zbekiston kompozitorlari va bastakorlari uyushmasi

 a’zosi, kompozitor                                                               

 ZarinaXodiyeva