Рассом нигохида ватан туйғуси

Санъат чегара, тил, дин, миллат танламайди. Шунинг учун ҳам ижод аҳли барча миллат ва элатлар орасида қадимдан қадрланиб келган. Ижодкор рассомлар фикрини, дунёқарашини тасвирда, рангларда ифода этиб, ички “мен”ини картина ва полотноларда ифода этишган.

Манзара жанри орқали рангтасвирда бир қанча асарлари билан республика кўргазмаларида иштирок этиб келаётган рассом Наима Шукурлаеванинг 14 август куни Швециянинг Вестервик шаҳрида “VÄSTERVIKS TEATeR & KONFERENS” биноси кўргазмалар залида “Шарқдан Ғарбгача” деб номланган шахсий кўргазмаси бўлиб ўтди. Унда рассомнинг сувбўёқ ва мойбўёқларда ишлаган асарлари намойиш этилди. Рассом Вестервик шаҳрида саноқли кунлар давомида 30 дан ортиқ манзаралар ишлади. Рассомнинг Вестервик шаҳри нам ҳавосида ишлаган асарларида ранглар ёрқинлигини, ҳар бир асарга ўзига хос ёндошувни кўриш мумкин. Швециянинг яшил ўрмонларга бой манзарасини турли ракурсларда қисқа вақт мобайнида ифода эта олди. Буни Вестервик шаҳар газетасининг санъатга бағшланган рукнида журналист Лотта Гометз “Вестервик мотивлари Ўзбек рассомини илҳомлантирди” номли мақоласи мисолида билиш мумкин.                        

“Vaterviks-Posten” газетаси журналистлари ушбу кўразмага тайёргарлик жараёни тўғрисида қизиқарли хабарлар ёзишган.

Рассом Наима Шукурлаева эса швециялик журналистларнинг юрти манзараси билан фахрланиб ёзган эътирофидан кўра, Ўзбекистоннинг сўлим манзараларини, юртининг ҳавосини узоқ шимолий ғарбга етказа олганидан, томошабинлар “Ҳумсонда баҳор”, “Эски шаҳар” “Ёзги ошхона: тандир, ўчоқ” каби асарларини қизиқиш билан томоша қилганидан хурсандлини таъкидлайди.

-          Ишонасизми, дастлабки борган кунларим шаҳарнинг эътиборимга тушган жойларини қоғоз ва матога кўчира бошлаганимда ерлик аҳоли қизиқиш билан қараб, қаердан эканлигимни сўрашди. Айни шу дамда ичингиздаги ватан туйғуси юртнинг отини аташингиз билан ҳар қачонгидан кўра кўпроқ қадрли ва ёқимли туюлишини ҳис этдим, дейди  Наима Шукурлаева.

Инобат Иманкулова